ULUKILANIO LWA MÜNDU
Lelo ïnjoka jo jäkindilïle ubukomu mfinyamäna fyosa ifi UNTWA Kyala äpelile. Jilinkunndälüsya unkïkulu jilinkuti; ngïmba sya naloli ukuti Kyala atile mungalyaga iseke sya mipïki gyosa igya munngünda? Umwene unkïkulu alinkwamula alinkuti; tubagile ukulya iseke sya mipiki gyosa igya munngünda. Loli iseke isya mpiki ugu guli pakati na pakati pa nngünda syo Kyala atile mungalyaga, nukupalamäsya mungasipalamäsyaga, bäti linga tulïle twisakufwa. Ijëne injoka jilinkummbüla unkïkulu jilinkuti, nakamo mutisakufwa naloli. Lelo bo unkïkulu agubwene umpïki ukuja nnunu nukuja gwa seke inunu syakulya kangi gukunkyela pakugukëta, nukuti gwabagïle ukumpa umündu amahala, po papo alinkutüngula simo iseke alinkulya alinkumpapo simo na ju nndume; jöpe alinkulya. Lelo bo balïle amäso gäbo bo babïli galinkwiguka, balinkwimanya ukuti bakafwala nafimo balinkusonania amäni ga nkuju go galinkuja sänja sya kufwala. Po papo Atamu nu nkasi balinkwibïlila mmipiki gya munngünda ukuti Kyala angababona. Umwene UNTWA Kyala alinkukölela alinkuti, Atamu, uli kügu? Kingamo ulïle ïseke sya mpiki isi nakukänïsye ukuti ungalyaga? Atamu alinkwamula alinkuti: Unkïkulu uju gwalïmbële ukuti ajege mwinänu, jo ämbële ïseke sya mpiki nndïle. Po papo UNTWA Kyala alinkunndälüsya unkïkulu alinkuti: Gwandile bule bule ukubömba sisisi? Unkïkulu alinkwamula alinkuti: Ïnjoka jïsyobile, po papo nëndile nukulya.